يوم ملوش لازمة

مش مظبوطة من غير أسباب طبيعية أو مش طبيعية ، بس مش مرتاحة  ومش مهتمة أبقى مرتاحة إزاى كمان. من إمبارح ظهرت الأعراض . فجأة الساعة 3 بالليل اتفقنا نتقابل قعدت اتحنتف من ساعتها بقى لحد الصبح عملت شعرى طلعت اللبس اللى هلبسه وحطيت مونيكير بحب لونه ودخلت انام على الفجر كدة بس ماجليش نوم . كان واحشنى بقالى أكتر من اسبوعين مش بشوفه علشان الامتحانات الزفت، الساعة 8 ونص بعتلى رسالة بيسألنى صحيت ولا لاء قلتله مانمتش اصلاً قاللى ولا أنا. كنت هدخل البس وننزل زى ما اتفقنا بس لحظة فكرت انه مينفعش ينزل وهو مطبق ويرجع ينام بقية اليوم وميذاكرش للامتحان اللى بعده وقررت انى مش هنزل اشوفه بعتله رسالة اقترحت نأجل نزولنا لبعدين وينام عشان يصحى يذاكر و منزلناش، جالة شوية إحباط صغيرين لاء شوية كتييير .

كان معايا علبه سجاير ماكبث خلصتها كلها كان فيها تقريباً 17 سيجارة اول مرة اشرب سجاير فى البيت ارتحت انى بعمل اللى عاوزاه من غير ما اشيل هم اكتشاف ماما لريحة الدخان

نمت الساعة 2 الضهر بعد 2 شاى ومج قهوة و2 نسكافيه معرفتش انام بسرعة عشان بطنى كانت وجعانى عشان ماكلتش ، صحيت الساعة 11 بالليل عملت مكرونة و دخلت شفت حد بعتلى حاجة عالفيسبوك ولا لاء وشفته هو تحديداً بعتلى حاجة ولا لاء ملقتش حاجة منه . بعد كدة وانا باكل فيلم الكيت كات كان شغال اتفرجت عليه ووحشنى أبويا اوى  جت اعلانات فصلت الفيلم قررت اقوم انام تانى. معرفتش انام رحت قعدت أقرأ قفلت النور عشان كان واجع عينى وولعت شمعة وقريت فى السرير لحد ما نمت الساعة 7 الصبح. كان المفروض انزل اقابل اوشا بس مقدرتش انزل وراحت عليا نومة مع انى ظبطت الموبايل وصحيت الساعة 5 العصر.

كنت قافلة الموبايل كل ما افتحه القى مامته اخر رقم اتصل بيا قلقت فعلاً بس ماكنتش قادرة اتكلم مع حد فقفلت الموبايل تانى وفتحاه دلوقتى وهى ماتصلتش . بفكر هتكون عاوزة تكلمنى فى ايه؟! مش عارفة بس قلقانة

دلوقتى انا جعانة و مستية ناوناو ترجع من الدرس عشان ناكل مع بعض